బీజేపీ ఎంపీ విందుపై అఖిలేశ్ యాదవ్ సెటైర్

లక్నో, నవంబర్ 18: బీజేపీ ఎంపీ విందుపై సమాజ్‌వాదీ పార్టీ(ఎస్పీ) చీఫ్ అఖిలేశ్ యాదవ్ సెటైరికల్ ఎద్దేవా చేశారు.  బీజేపీ ఎంపీ కార్యాలయంలో జరిగిన ‘మటన్‌వార్ చరిత్రకెక్కింది’ అని ఆయన విమర్శించారు. యూపీలోని మీర్జాపూర్‌లో బీజేపీ ఎంపీ వినోద్ కుమార్ బింద్ పార్టీ నేతలు, కార్యకర్తలకు.. ఆయన కార్యాలయంలో శనివారం విందు ఇచ్చారు. అయితే విందులో మటన్ గ్రేవీలో మాసం ముక్కలు లేవని బీజేపీ నేతలు, కార్యకర్తలు ఆరోపించారు.

అక్కడితో ఆగకుండా వడ్డించే వ్యక్తిని వారు తీవ్రంగా కొట్టారు. దీంతో ఆ విందులో గందరగోళం చెలరేగింది. బీజేపీ సీనియర్ నేతలు జోక్యం చేసుకొని పరిస్థితిని అదుపులోకి తెచ్చారు. ఈ విషయమై మీడియాలో వచ్చిన కథనాలపై అఖిలేశ్ స్పందిస్తూ తీవ్ర విమర్శలు చేశారు. ‘వివిధ రకాల యుద్ధాలను చూశాం. మొట్టమొదటిసారిగా మటన్‌వార్‌ను చూస్తున్నాం’ అని బీజేపీ నేతలకు చురకలంటించారు.