సంయుక్త మీనన్ బుధవారం పుట్టిన రోజు జరుపుకొంది. దీంతో సంయుక్త ప్రస్తుతం నటిస్తున్న ప్రాజెక్టుల బృందాలు ఆమెను శుభాకాంక్షల జల్లులతో తడిపేశాయి. ఆయా సినిమాల్లో నుంచి విడుదలైన ఈ అమ్మడు ఫస్ట్‌లుక్ పోస్టర్లు అభిమానులకూ పండుగ తెచ్చిపెట్టాయి! ప్రస్తుతం శరవేగంగా షూటింగ్ జరుపుకొంటున్న శర్వానంద్ 37వ మూవీలో సంయుక్త మీనన్ నటిస్తోంది. ఈ సినిమాలోని సంయుక్త పాత్ర ‘దియా’ను పరిచయం చేస్తూ మేకర్స్ పోస్టర్ విడుదల చేశారు. ఇందులో సంయుక్త సంప్రదాయ శాస్త్రీయ నృత్యం చేస్తోంది.

రామ్ అబ్బరాజు దర్శకత్వంలో రామబ్రహ్మం సుంకర నిర్మిస్తున్నారీ చిత్రాన్ని. మరోవైపు బెల్లంకొండ సాయి శ్రీనివాస్ హీరోగా రూపొందుతున్న సినిమాలోనూ సంయుక్త హీరోయిన్‌గా నటిస్తోంది. లుధీర్ బైరెడ్డి దర్శకుడిగా పరిచయమవుతున్న ఈ సినిమాకు మహేశ్ చందు నిర్మాత. సంయుక్త ఫీమేల్ లీడ్ పోషిస్తున్న ఈ చిత్రం నుంచి ఆమె పాత్రను ‘సమీర’గా పరిచయం చేస్తూ మేకర్స్ ఫస్ట్‌లుక్ పోస్టర్‌ను విడుదల చేశారు. దీంట్లో మోడరన్ అమ్మాయి లుక్‌లో అందంతో కవ్విస్తోందీ స్వీట్‌హాట్.

ఇదిలా ఉండగా, హీరో నిఖిల్ కథానాయకుడిగా తెరకెక్కుతున్న ‘స్వయంభూ’లోనూ సంయుక్త కథానాయికగా నటిస్తోంది. భరత్ కృష్ణమాచారి దర్శకత్వం వహిస్తుం డగా భువన్, శ్రీకర్ ఈ చిత్రాన్ని నిర్మిస్తున్నారు. పీరియాడిక్ వార్ బ్యాక్‌డ్రాప్‌లో రూపొందుతున్న ఈ మూవీలో నిఖిల్ సరసన సంయుక్త, నభా నటేష్ హీరోయిన్లుగా నటిస్తున్నారు. తాజా ఫస్ట్‌లుక్ పోస్టర్‌లో సంయుక్త విల్లు, బాణాలు పట్టుకుని వారియర్‌గా కనిపించింది. ఇరవై తొమ్మిదో పడిలోకి అడుగుపెడుతున్న వేళ.. బర్త్‌డే పాప ఇలా తనదైన లుక్స్‌తో అదరగొట్టింది!!