కాట్రియాలలో విషాదం

రామాయంపేట, నవంబర్ 23: సాగు కోసం చేసిన అప్పులు భారంగా మారడంతో ఓ రైతు ఉరివేసుకొని ఆత్మహత్యకు పాల్పడిన సంఘటన రామాయంపేట మండలం కాట్రియాలలో జరిగింది. రామాయంపేట ఎస్సై బాలరాజ్ తెలిపిన వివరాలు.. కాట్రియాలకి చెందిన రాజయ్య(50) తన ఎకరం భూమి సాగు చేస్తూ కుటుంబాన్ని పోషించుకుంటున్నాడు.

ఈ క్రమంలో తన కొడుకుకు ప్రమాదంలో చేయి విరగడంతో ఆస్పత్రి, ఇంటి ఖర్చులు, పొలానికి చేసిన అప్పులు భారంగా మారాయి. దీంతో బతుకుదెరువు కోసం కుటుంబంతో సహా ఆర్మూర్‌కు వలస వెళ్లినా అప్పులు తీరే దారి కనిపించకపోవడంతో తిరిగి గ్రామానికి చేరుకున్నాడు.

ఉన్న పొలాన్ని సాగు చేసుకుంటున్నప్పటికీ చేసిన అప్పులు తీర్చలేక మనస్తాపానికి గురైన రాజయ్య గ్రామ శివారులోని ఓ చెట్టుకు ఉరి వేసుకొని ఆత్మహత్య చేసుకున్నాడు. భార్య మమత ఫిర్యాదు మేరకు రామాయంపేట పోలీసులు కేసు నమోదు చేస్తి దర్యాప్తు చేస్తున్నారు.