మహా కుంభమేళా తేనె కళ్ల సుందరి మోనాలిసా అందం ఇక వెండితెరపై కూడా తళుకులీననున్నది. మధ్యప్రదేశ్ ఇండోర్‌లోని మహేశ్వర్‌కు చెందిన మోనాలిసా.. ప్రస్తుతం ఉత్తరప్రదేశ్ ప్రయాగ్‌రాజ్‌లో కొనసాగుతున్న మహా కుంభమేళాలో పూసలు అమ్ముకుంటూ సోషల్ మీడియా ద్వారా ఫేమస్ అయిపోయింది.

దీంతో ఆమెకు ప్రముఖ రచయిత, దర్శకుడు సనోజ్ మిశ్రా.. సినిమా ఆఫర్ చేస్తూ ఇటీవల ప్రకటించాడు. ఈ క్రమంలో ఆయన మోనాలిసా స్వగ్రామం చేరుకున్నాడు. మోనాలిసాతో, ఆమె కుటుంబ సభ్యులతో మాట్లాడి సినిమాలో నటించేందుకు ఒప్పించా డు. ఈ ఫోటోలు, వీడియోలు ప్రస్తుతం సోషల్ మీడియాలో వైరల్ అవుతున్నాయి.

తాను తెరకెక్కించనున్న ‘డైరీ ఆఫ్ మణిపూర్’ చిత్రంలో మోనాలిసా నటించనుందని, ఆమె పాత్రకు మంచి పేరు వస్తుందన్నాడు. సినిమా షూటింగ్ ప్రారంభానికి మరో నెల రోజుల గడువు ఉన్నందున అప్పటివరకు ఆమె యాక్టింగ్ క్లాస్‌లకు హాజరయ్యే ఏర్పాట్లు చేయనున్నట్టు వెల్లడించాడు.

‘డైరీ ఆఫ్ మణిపూర్’లో మోనాలిసా ఓ ఆర్మీ ఆఫీసర్ కూతురిగా కనిపించనున్నట్టు తెలుస్తోంది. దాదాపు రూ.20 కోట్ల బడ్జెట్‌తో ఈ చిత్రం తెరకెక్కనున్నట్లు సమాచారం. అక్టోబర్‌లో ఈ చిత్రాన్ని ప్రేక్షకుల ముందుకు తీసుకువచ్చేందుకు చిత్రబృందం సన్నాహాలు చేస్తోంది.